أوعي تعاقبي إبنك بحرمانه من احتياج أساسي عنده.

 خلي بالك يا ماما ،أوعي تعاقبي إبنك بحرمانه من احتياج أساسي عنده.

في نوع من العقاب بيـ.ـدمر الطفل من غير ما تحسي، بيهدم شخصيته مش سلوكه.

كتير من الأمهات لما طفلها يغلط، بتعاقبه بحرمانه من حاجه هو بيحبها، وده مفيهوش مشكله وممكن يكون وسيلة تربوية أوقات، لكن الكارثة الكبيرة إن في أمهات بتعاقب طفلها بحرمانه من احتياج أساسي،مش من رغبة بسيطة.

الاحتياج الأساسي مش رفاهية نلعب فيها خالص ،ده زي النفس اللي بيتنفسه الطفل، زي المية والأكل اللي لو اتحرم منهم يمـ.ـوت.

إيه هو الاحتياج الاساسي للطفل؟

* احتياجه للحب ❤️

* احتياجه للتقبل 🤝

* احتياجه للأمان 🕊️

* احتياجه إنه يحس إنك جنبه حتى لو غلط 🫶

* احتياجه إنك تشوفيه على إنه لسه بيتعلم يعني لازم يغلط 👶

لكن للأسف، لما تعاقبيه بانك تحسسيه انك هتسحبي حبك منه، أو تخاصميه، أو تقوليله الجمل القاتـ.ـلة

أنا مش بحبك لما تعمل كده أو بعد اللي عملته ده مش هحضنك أو مش هحبك

فـ انتي كده بتعاقبيه بحرمانه من الأمان النفسي والتقبل ، اللي هم أساس شخصيته وحياته كلها ،وكأنك بالظبط بتعاقبيه بحرمانه من الأكل والشرب 💔

الطفل اللي بيتحرم من الحب لما يغلط، هيكبر دايمًا حاسس إنه مش كفاية، وهيفضل طول عمره بيحاول يرضي الناس عشان ياخد منهم اللي اتحرم منه زمان… (القبول).

والطفل اللي بيتحرم من التقبل، هيتعلم يخبي غلطه بدل ما يتعلم يصلحه.

هيتعلم يمثل علشان ما يتهاجمش، وهيفقد الثقة في نفسه، لإنه كل مرة كان محتاج حضنك، لقى بعدك.

والطفل اللي بيتحرم من الأمان، بيعيش في خوف مستمر طول حياته.

خايف يغلط، خايف يترفض، خايف يتساب.

وده الخوف اللي بيكمل معاه طول عمره حتى لما يكبر ويبقى راجل أو ست.

مش معنى كده إنك ما تعاقبيهوش ومتعلمهوش الصح من الغلط، بس العقاب اللي بيخليه يتعلم لازم يكون فيه حب مش وجع.

فيه احتواء مش إهانـ.ـة.

فيه حدود مش تـ.ـهديد.

لو غلط، احضنيه الأول، وبعد كده اتكلمي معاه.

خليه يحس إنك زعلانة من السلوك، مش منه هو كشخص.

خليه يعرف إن حبك مش بيتوقف على تصرفاته.

إنك بتحبيه في كل الحالات حتى وهو غلطان.

لأن الطفل اللي بيغلط وهو حاسس بالأمان، بيتعلم من غلطه، لكن الطفل اللي بيغلط وهو خايف، بيتـ.كسر ومش بيبطل يعمل الغلط.

خديها قاعدة:

العقاب اللي بيحرِم الطفل من حبك، بيحرمه من الأمان والطفل اللي اتحرم من الأمان وهو صغير، عمره ما هيبقى مطمئن في حياته كلها.

احتويه، افهميه، وجهيه، لكن أوعي تعاقبيه بحرمانه من احتياجه الأساسي.

لأنك كده بتعاقبيه بحرمانه من نفسه.

#وليد_ابوطالب

#اخصائي_تعديل_سلوك_الاطفال_والمراهقين

#معالج_نطق_وكلام