الضغط المزمن المنخفض أخطر ولا المرتفع ؟؟؟
الضغط المثالى أقل من ١٢٠/٨٠ وياسلااااام لو ١١٠/٧٠ .
_الضغط المنخفض⬇️ أقل من ٩٠/٦٠
الضغط المرتفع ⬆️أكتر من ١٣٠/٩٠
_الضغط المنخفض ⬇️ لو مش عامل أعراض "مش لازم" تعالجه وعيش حياتك .
الضغط المرتفع ⬆️لو مش عامل أعراض " لاااازم " تعالجه علشان تقدر تعيش حياتك !
_ الضغط المنخفض⬇️ طالما انك كويس _مش هبوط حاد بالدورة الدموية ومحجوز فى الرعاية أو يحدث سقوط وإغماء متكرر _ مش محتاج محاليل كل شوية ولا يسبب تلف بأنسجة الجسم ولا له مضاعفات جانبية خطيرة على المدى البعيد (ودة أهم حاجة) مافيش أعراض>>> مافيش مشكلة.
الضغط المرتفع⬆️ يسبب تلف بأنسجة الجسم زي العين والمخ والكلى والقلب وله مضاعفات جانبية خطيرة حتى لو بدون أعراض، خد بالك !
_الضغط المنخفض⬇️ أعراضه دوخة وتعب مع أقل مجهود وشعور بالإغماء خصوصا مع الوقوف مدة طويلة أو التعرض لحرارة الشمس وعدم القدرة على التركيز.
الضغط المرتفع⬆️( لو عمل أعراض) يبقى ستر ربنا علشان تعرف وتعالجه قبل مايعمل مشكلة ، أعراضه قد تكون صداع أو نزيف من الأنف أو ألم بالصدر أو لغبطة بضربات القلب أو وجع بالرأس وطنين بالأذن أو إجهاد شديد أخر اليوم.
_لو عندك ضغط منخفض ومش عامل أعراض خير وبركة
أما الضغط المرتفع⬆️ فيسمى "القاتل الصامت" لأنه لو مش عامل أعراض فأول مرة تكتشفه قد يكون _ بعد الشر عليك ياحبيب قلبى _ نزيف بالمخ أو جلطة بالقلب أو فشل كلوي !
_الضغط المنخفض ⬇️علاجه الأساسى شرب ماء وسوائل (٣ لتر يوميا) وأكل فيه ملح أكتر، وشرب فنجان أو اتنين قهوة يوميا ووراهم كوباية ماية كبيرة، وتغذية سليمة والإكثار من الفواكه والخضروات، ونوم كافى ، وتجنب الوقوف فترات طويلة، وممارسة الرياضة لتقوية عضلات الساقين، وأخر حاجة نلجأ لها العلاج الدوائى.
مع عمل تحليل صورة دم وظائف الغدة الدرقية ونسبة الكورتيزول والأملاح بالدم.
أما الضغط المرتفع⬆️ علاجه الأساسى "قرص الضغط" + غذاء قليل الملح والدهون وتجنب الضغط العصبي والتوتر وممارسة الرياضة والامتناع عن التدخين مع عمل تحليل وظائف كلى وكولسترول وصورة دم ورسم قلب وايكو.
_ ٩٠% من أسباب الضغط المرتفع⬆️ ورث عن بابا وماما (وراثية وجينات) وعلاجه انك ترجع بالزمن وتغير بابا وماما أو تضطر أسفاً تكشف وتاخد علاج 😊، يعنى ممكن تعمل كل حاجة توقف تدخين وتقلل وزن وتكون رياضى وبردو يجيلك ضغط، لان كفاية إنك مصرى وعايش معانا 🤭
_العلاج للضغط المنخفض ⬇️أختيارى لو انت كويس ماتخدوش، أما العلاج للضغط المرتفع إجبارى لازم تخده.
اللي يقولك علاج الضغط المرتفع⬆️ بالكركدية وماتخدش دواء علشان ماتتعودش عليه هو صاحب نظرية (نعالجك ليه طالما نقدر نموتك ؟!)
الكلام دة عن الضغط المزمن، أما الفرق بين الإرتفاع الشديد ١٨٠/١١٠ أو الإنخفاض الشديد ٨٠/٥٠ المفاجئ للضغط، أجرىىىىى على الطوارئ أنت لسة هتسئل ؟!!!
#خالد_حامد
#قلب_الطرابيزة
#احنا_دكاترة_القلب
ليست هناك تعليقات:
إرسال تعليق
رأيك يهمنا