مرحلة العض والضرب والصفع عند الأطفال

لو عندك طفل ما بين سنة ونص لـ ٣ سنين، فأكيد عديتِ بالمرحلة دي!

فجأه كده وبدون أي مقدمات:

يصفعك على وشك! 👋

يشد شعرك! 💇‍♀️

يعضك! 🦷

يضرب طفل تاني! 😱

ماتقلقيش... دي مرحلة طبيعية كل الأطفال بيمروا بيها، والأهم نعرف ليه بتحصل ونتصرف إزاي.

طيب إيه أسباب العض والضرب؟

فيه سببين رئيسيين:

1️⃣ الاهتمام:

الطفل في السن ده بيحس إنه محور الكون، وعاوزك دايمًا تبصي له، تلعبي معاه، تهتمي بيه...

لو حس إنك مشغولة أو تعبانة؟ هيضربك عشان ياخد انتباهك! ⚡

2️⃣ التعبير:

الطفل مش بيعرف يعبر بالكلام، فيلجأ للعض أو الضرب عشان يقولك:

"بصيلي"، "العبي معايا"، "سيب الموبايل"، "اللعبة دي بتاعتي" 🗣

نعمل إيه بقى؟

✅ افهمي إن دي وسيلته للتواصل، مش لأنه شرير.

✅ امسكي إيده قبل ما يضرب وقولي له بهدوء: "الضرب مرفوض"، وبعدها ابوسي إيده.

✅ ماينفعش تسيبيه مع أطفال لوحدهم.

✅ إوعي تضربيه! إزاي هتعلميه ما يضربش وإنتي بتضربي؟

✅ لو جعان، نعسان، تعبان… هيكون أكتر عرضة للعنف.

✅ قللي الحلويات والسكريات الكتير! 🍭

✅ راقبي اللي بيشوفه في الشاشات.

✅ أقل من سنتين؟ مفيش شاشات خالص! 📺

✅ وأخيرًا، تأكدي إن ابنك مش بيتعرض لأي عنف من أي حد.

أطفالنا محتاجين فهم واحتواء مش عصبية وضرب!

ربنا يعينك ويعين كل أم… انتِ بتعملي أعظم شغلانة في العالم.

 المصدر : مركز رسالة لذوى الاحتياجات الخاصة